தமிழ் அறிவோம்! " பாரிடத்தில் கண்டே பகர் "

 

சுந்தர கவிராயர் ஒருநாள் ஒரு புதுமையானக் காட்சியைக் கண்டார்.  வியப்பில் ஆழ்ந்தார். தான் கண்ட காட்சியை விடுகதைபோல் அமைத்து ஒரு  பாடலை உருவாக்கினார். அந்தப் பாடலை இங்குக் காண்போம்.

" பத்துக்கால் மூன்றுதலை பார்க்கும்கண் 

ஆறுமுகம் இத்தரையில் ஆறுவாய் 

ஈரிரண்டாம் - இத்தனையும் 

ஓரிடத்தில் கண்டேன் உகந்தேன் களிகூர்ந்தேன் 

பாரிடத்தில் கண்டே பகர் " 

( சுந்தரகவிராயர் தனிப்பாடல் திரட்டு)

பத்துக்கால்கள் , மூன்று தலைகள் , பார்க்கின்ற ஆறுகண்கள், ஆறு முகங்கள், நான்கு வாய்கள் ஆகிய இத்தனையும் கொண்ட ஒன்றை இந்த உலகில் ஒரே இடத்திலேயே பார்த்தேன்.  அதன்மீது விருப்பம் கொண்டேன். மகிழ்ச்சி அடைந்தேன். இந்தப் புதுமையானக் காட்சியைக் கண்டு  என்னவென்று  கூறுங்கள்?   " என்கிறார் சுந்தர கவிராயர். 

அவர் கண்ட காட்சி என்ன  தெரியுமா?

உழவன் ஒருவன் இரண்டு காளைகளைக் கொண்டு ஏர்கலப்பையினால்  நிலத்தினை உழும் காட்சியையே அவர்   கண்டிருக்கிறார். அந்தக் காட்சியை  வைத்தே  இப்பாடலைப் பாடியுள்ளார். 

பத்துக்கால்கள். 

இரு காளைகளின் கால்கள் + உழவனின் கால்கள். 

8 + 2 = 10.

மூன்று தலைகள். 

இரு காளைகளின் தலைகள் + உழவனின் தலை.

2 + 1 = 3 .

 ஆறுகண்கள். 

இரு காளைகளின் கண்கள் + உழவனின் கண்கள். 

4 + 2 = 6 .

ஆறு முகங்கள்.

இரு காளைகளின் முகங்கள் + உழவனின் முகம் + ஏர் கலப்பையில் உள்ள மூன்று கொழு முகங்கள் .

2 + 1 + 3 = 6 .

நான்கு வாய்கள்.

( ஈரிரண்டு - 2 × 2 = 4 )

இருகாளைகளின் வாய்கள் + உழவனின் வாய் + ,ஏர்கலப்பையின் நாழிவாய்.

2 + 1+1 = 4 .

இப்போது அந்தப் பாடலை மீண்டும் வாசித்துப் பாருங்கள். சுந்தர கவிராயரின் கவிநயம் விளங்கும்.  

இவண் 

ஆ.தி.பகலன்,

நெறியாளர்,

சதுரை திருக்குறள் பேரவை,

சதுரங்கப்பட்டினம்.

( அலைப்பேசி - 9965414583) .